الخوف ده غريزه انسانيه مرتبطه بغريزة حب البقاء ، كلنا بنخاف ولكن بطرق ودرجات متفاوتهوكل ما الانسان بيكبر بيزيد معاه الخوف
وبيتحول خوفه من مجرد خوف من الاشياء الماديه الملموسه للحاجات المعنويه ، والناس بتتفاوت فى درجة الخوف
الخوف كمان غريزه أتطورت بتطور الانسانيه واتساع علمها من منطلق ان اكتر شىء يخوف الانسان الشىء اللى بيجهله ومش لاقيله تفسير ،
وظاهرة تحول الخوف لوسيلة للتسليه ده شىء مش جديد على الانسان فمن زمان والناس بتحب تألف قصص مخيفه وبتعشق تداولها لحد تناقل الاجيال ليها باعتبارها تراث شعبى، وتقريبا تكاد لا تخلو منطقه فى العالم من تراث الخوف
اللى بيتماشى مع طبيعة البيئه الجغرافيه والمستوى الثقافى لشعبها
عندنا مثلا فى مصر ونظرا لأنها بيئه زراعيه تعتبر أمنا الغوله والنداهه من تراث الخوف المصرى
فى حين ان مصاص الدماء والمذؤبين تراث خوف مختلف مرتبط بالمجتمعات الاوروبيه القديمه
أما الموتى العائدون وأشباح البيوت المهجوره فهى تقريبا تراث عالمى
على المستوى الشخصى فأنا بعترف انى انسانه خوافه وبخاف من حاجات كتيييير:
بخاف من حاجات معنويه زى الخيانه و الغربه والوحده و من العصبيه و من الفراق ،
وبخاف من المجهول اوى ومن الفشل فى أى حاجه،
وبخاف من الموت ،
وبخاف اوى على أى حد يهمنى خصوصا أهلى،
وبخاف من الحشرات جدا جدا،
لكن بصراحه ما بخافش من أفلام الرعب بقرف بس و مبحبش أشوفها أصلا فيلم الرعب الوحيد اللى شوفتو كملته وعجبنى شوفتو كانthe others..
كفايه عليكو كده بس القائمه طويله
أما بقى عن أكبر شىء بيرعبنى فى الدنيا فهو يوم القيامه ،لأنه يوم ربنا وصفوا ب((يوم الفزع الاعظم)) ... يوم هيبعث فيه كل البشر بعد مماتهم وهايتحاسبو فيه على كل حاجه عملوها فى حياتهم وهيمروا بأهوال وهيطول الحساب وأعوذ بالله ممكن يبقى فى كمان جهنم
بجد بجد دى أكتر حاجه فى الدنيا بترعبنى واكبر حاجه ممكن تخوف اى انسان لأنها فعلا فوق قدرته على الاستيعاب و التحمل
ربنا يجعلنا من الأمنين يوم الفزع الاكبر ... امين
11 comments:
يامامااااااااا
اخس عليك يا دودو كده تخضينى أول ما أدخل البلوج
عارفة أنا بكره الخوف بس ده ما يمنعش انى بخاف برده، ما بخافش من الظلمة بس بخاف من الحشرات زيك بالظبط رغم انها مخلوقات ضعيفة أضعف مننا بكتير بس بخاف منهم اوى مش عارفة ليه كده
أما يوم القيامة فبجد ربنا يرحمنا،بس الخوف بقى من يوم القيامة حاجة كويسة لان احنا لو فضلنا فاكرين اليوم ده وصورته فى ذهننا دايما مش حنخلط ولا نرتكب ذنوب، المشكلة ان احنا بننسى
أنا من ساعة مشوفت فيلم the exorcism of emily rose وأنا كرهت كل أفلام الرعب، فيلم مخيف إلى أقصى الحدود، وفيلم الرعب الوحيد اللي لما شفته جاتلي كوابيس بعدها
أما بقى يوم القيامه، فهو طبعا يوم مخيف إلى أقصى الحدود، بس أنا عن نفسي اللي بيرعبني أكتر هوه القبر وظلمته وضيقه على أساس أنه حاجه الواحد شايفها قدامه في الدنيا وبيشوف ناس بيتدفنوا فيه، أما يوم القيامه فهو في علم الغيب
ربنا يرحمنا جميعا إن شاء الله
فعلا صح كل بيئة جغرافية ليها تراثها فالخوف( معلومة جديدة) يعنى انا بخاف من طنط النداهة دى رغم انى حتى ماشوفتش الفيلم.
و الانسان عموما بيخاف أوى من الغربة و الفراق ، بس مش بخاف من الخيانة قد ما بكرها و مش بخاف من العصبية قد ما بحاول أقللها فيا ة أعذر اللى بيقع فيها.
و على فكرة بأه يعنى(( فى معلومة غلط بس بلاش نعمل سياحة على البلوج) ،، فاكرة الفيلم اللى دخلناه فى سنة تالتة ثانوى....... شكلك نسيتىloooool
شوشو :بجد اخس عليا لو اعرف ماكنتش نزلت البوست وبعدين طلعتى جبانه وبتخافى من الحشرات، وعندك حق فى موضوع فايدة الخوف من يوم القيامه انو بيورث الانسان نوع من التقوى
ايمن:عندك حق فى موضوع الخوف من الموت ده لانو صعب جدا انتقال النسان من حياتو لحياه ومكان مش عارف هيفضل فيه ازاى ولامتى فى ظلمه وضيق ووحده ....اللهم اجعل قبورنا روضه من رياض الجنه وانس فيها وحدتنا وغربتنا
سلومه:فكرتينى..احكى بقى للناس على الفيلم المقرفfreedy and jessonاللى اقنعونى ناس اصحخابنا انى ادخوله وفى عز مانا قرفانه ومذعوره من مناظر الدم والقرف كان فى ناتس اصحابنا اسمهم سلمى فطسانين على روحهم من الضحك وكأنه فيلم كوميدى ، ولتصحيح معلوماتك يا سلوم هانم الفيلم دخلناه فى اجازة نص السنه فى اولى جامعه
حلو البوست يا هدى
بس بصراحه ماتوقعتش انك انتى بالذاااات تكتبى عن الخوف والفزع وافلام الرعب والحاجات دى
غريييييييييبة :D
ما علينا
تقريبا كلنا بنخاف من يوم القيامة والحساب
ومازلت لا اخاف من افلام الرعب والحشرات ولا الحيوانات ولا الحاجات دى
على اعتبار انى جامده بقى وبتاع
:D :D
دينا:نورتى البلوج صار لك فتره مانورتيه،وبعدين ليه بس مستغربه لييه بس انى اكلم عن الرعب والخوف بجد لازم تقليلى....
ماعلينا
انا بردو عارفه انك جامده موت ولا بتخافى من الحاجات دى كلها ولا من الجن الازرق شخصيا
مقال جميل للغاية
والاروع ختامه بهذه الجملة المعبرة
أما بقى عن أكبر شىء بيرعبنى فى الدنيا فهو يوم القيامه ،لأنه يوم ربنا وصفوا ب((يوم الفزع الاعظم)) ..
تحياتي لقلمك المبدع
صاحب البوابه:اولا شكر جزيل لك على تشريفى بزيارة المدونه للمره الثانيه ويارب ماتكونش الاخيره،
ثانيا شكرا لك على ذوقك العالى واسلوبك المبدع ربنا يجعلك وايانا من الأمنين يوم الدين
اختي العزيزة اتمني ان لا اكون من من تخافي منهم او حتي عليهم فانا استحق الكثير كما اتمني ان لا تخافي لان الخوف بلاء و مرض في بعض الاحيان واعلمي ان الله خلقنا لكي عون و حما من كل شر حتي لو كان عنكبوته هههههههههههههههه
الخوف .. وهل هو فطرة . ولا غريزة .. ولا سلوك ورد فعل لموقف
الخوف مش صورة واحده ومش بينحصر في اللي ممكن نشوفه علي شاشات السينما
في رعب اقوي وافظع
ممكن تكون تجربة السينما بالنسبة ليه شئ هين
محمد: فعلا عندك حق الخوف مش مصطلح سهل التعريف ولا له وجه واحد هو فعلا متعدد الاوجه
وبتفق فعلا معاك فى ان الاحساس بالخوف الحقيقى اكيد مش هيكون بمشاهدة فيلم سينما فى حاجات فعلا اكبر من كده
Post a Comment