تاااااااااج

اولا : شكرا لصديقتى الجميله شوشو صاحبة مدونة بحبك يا مصر على افتكارها ليه بالتاج ده ،
ومعلش يا شو على التأخير ..

ثانيا:نخش بأه علطول فى الموضوع ونجاوب على ال تاج

من هو:أحب شخص لقلبك فى الدنيا؟
الحمد لله انا بحب ناس كتير اوى ..
بس أتمنى أن يكون الرسول عليه الصلاه والسلام أحب الناس الى قلبى فى الدنيا
اما أكثر شخص متعلق بيه قلبى عايش مابينا حاليا فهو يويو أخويا الصغير

انسان مستعد تضحي بحياتك - ركز فى كلمة حياتك- علشانة؟
هو كذا حد ...
أولهم أهلى طبعا ،
بس يويو بالذات أنا مستعده اضحى بحياتى عشانه فى اى لحظه...

يويو

اسم أول حب؟
اتمنى أن حب ربنا يكون اول واخر واكبر حب بالنسبه لى ..
وماما اكيد هى اول انسان حبيته فى الدنيا
اما بقى اللى خيالوا راح لبعيد فمافيش حب اول ولا أخر
بس أن شاء الله الحبيب من النوع ده هيكون هو الاول والاخير والوحيد فى حياتى

اسم اخر حب(حتى الان)؟
أخر حب فى حياتى الى الان هما أصحابى ...
واللى لسه خياله واسع يراجع اجابة السؤال السابق

ما هو :اسم أجمل كتاب كتبه بشر قرأته ومحتفظ به حتى الان ؟
هو أغلب الكتب اللى قراتها محتفظه بيها لأانها فى مكتبة بابا
بس أجمل كتاب قراته هو الفصول فى سيرة الرسول
رغم انى لما خلصته حسيت انى عاوزه اعرف اكتر من اللى فيه ، لان كان فيه أجزاء مختصره اوى

اسم كتاب-كتبه بشر برضة- انت متعلق بيه وبتقرأه كل فترة؟
هى حكاية انى اعيد قرأة كتاب للمره التانيه حصلت معايا مرات قليله
أفتكر منهم :
كتاب الاحاديث القدسيه _عندى استعداد اعيد قرأته 100 مره
رياض الصالحين، بردو نفس الحكايه .
خوخة السعدان (مجموعة قصص قصيره)
مختارات شعريه لابراهيم ناجى


شىء تحس بالراحة النفسية عندما تنظر اليه ؟
كل المناظر الطبيعيه تأسرنى
السماء بالذات بليل
والخضره
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
البحر ... مشهد الغروب
، لما الشمس تدوب فى البحر ، بيجيلى الاحساس ده


مكان تحس بالراحة عندما تدخله ؟
الحرم اكتر مكان حسيت فيه بالراحه والامان رغم انى دخلته زمان وانا صغيره
يارب يكتب لنا كلنا زيارته
والمساجد عموما بحس فيها بالراحه ...



اجمل مدينة زرتها داخل مصر ؟
مرسى مطروح

أجمل مكان طبيعي رأيته داخل مصر؟
عجيبه فى مطروح


اهم جهاز منزلى انت متعلق بيه او بتستخدمه كتير ؟
حاليا الكمبيوتر متعلقه بيه بطريقه مرضيه


سرعة بروسيسور جهازك ؟
ماعنديش فكره بس هو غالبا سريع ومريح ..


حجم ذاكرة –هارد- جهازك ؟
160جيجا
على ضمانة مصطفى أخويا

نوع هاتفك المحمول؟
انا ما بشلش موبايل

المساحة التى تشغلها المواد الاسلامية على جهازك ؟
ماعرفش بالظبط
بس على الاقل لازم يكون فى مصحف مرتل لكذا قارىء

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟ د
سؤال فيه الاجابه النموذجيه

أهم هدف انت واضعه لحياتك دلوقتى ؟
اصعب سؤال ...
أصل المرحله دى مختلفه خالص حياتى
ولأول مره أحس أن الرؤيه مش واضحه ...
وأنا بصراحه مشتته
قدام أكتر من أختيار
أدعولى ربنا يثبتنى ويقدم لى اللى فيه الخير


مواصفات فتاة –أو فتى للبنات- الأحلام بالنسبة لك ؟
اولا يكون متدين ظاهرا وباطنا
وتكون اخلاقه عاليه
وشخصيته قويه
ومتكافىء معايا اجتماعيا وثقافيا
ويحترمنى
و يكون أفضل منى عشان يستحق القوامه
وعنده رحمه لاقصى الحدود
و.....
كفايه عليكو كده

صف ما يأتى :شعورك لما بتسمع كلمة مصر؟
للأسف مشاعر متناقضه
حب ، غيظ ، شفقه ، فخر ، ذل ،
يعنى حسب الظروف والسياق
ساعات اسمع اسمها فى القرأن أحس بالفخر
ارجع أشوف أحوالها أحس بالقهر
وأسمع سيرتها فى النشره أحس بالخجل ليها مش منها
أقرأ شعر عنها جسمى يقشعر وأحس أنى بحبها ..
كده يعنى

شعورك لما بتسمع كلام عن اليهود ؟
بصراحه هما علطول عندى مرتبطين بشعور سلبى للغايه
بيمثلوا بالنسبه لى ..الخيانه،الظلم ..
قتلة الانبياء والابرياء

شعورك لما بتشوف ظابط شرطة ؟
للأسف بشعر بعدم الامان ،
وده من قريب بعد فضائح التعذيب
بس انا بكره التعميم

شعورك لما بتشوف الكناس العجوز فى الطريق ؟
كان زمان بيصعب عليه لدرجة انى كنت بعيط
بس ماما قالتلى كلمه انا أمنت بيها جدا
(أنتى مش هتكونى أحن عليهم من ربنا الرحيم اللى خلقهم)...
بس بقيت بخاف على نفسى و أحس أنى من المترفين
وأفتكر أية :
((يوم تسألون عن النعيم ))

لون البطانية اللى بتتغطى بيها فى الشتاء ؟
بنى فى بيج فى هافان

لون الجورب-الشراب- المفضل لديك ؟
الاسود

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
بفرح بصراحه وبتمنى انه يكون قلبا وقالبا

احساس يراودك فى اشارة مرور مغلقة بسبب مسئول كبير؟
بقول من كل قلبى
:
حسبى الله ونعم الوكيل


فى النهايه بمرر التاج ده ل:

خيال الظل
،GAZZAR50،
سلومه،دينا

عمرو الببلاوى،كاسبر
وفى ناس تانين كنت عاوزه أمررهلهم بس فى حد سبقنى..
بس بجد أى حد نفسوا فيه يتفضلوا